Un cantor ëd Langa

Vard-lo sì ‘l librèt ch’a canta ‘n cantor ëd Langa: ‘l «Brav’om di Prunetto», torototela dle Langhe, fisa e paròle gropà da na liassa fòrta e drua. ‘L librèt a l’é stàit cudì da Luciano Bertello (bele fòto ‘d Bruno Murialdo e ‘d Bruno Martina), e stampà da l’Artistica ‘d Savijan, grassie a la Fondazione Casa del Tartufo bianco d’Alba e dl’Università dei canti di tartufo (pp. 52, s.i.p.). ‘L Brav’òm a sta a Prunaj (parèj Prunetto ant ël sò langhèt) e a së s-ciama Bruno Carbone. A l’é ‘n përsonage, generos e franch. A son-a la fisa e a teorisa sò travaj. A protesta contra ‘n mond ch’a l’é dventà tròp fàcil e a sita Tasso chërdend ‘d sité Dante: “Chi non gela e non suda, e non s’estolle/ dalle vie del piacer, là non perviene”, dasand-je rason al Croce, ch’a parlava dij rapòrt tra poisìa popolar e poisìa d’art: un-a ch’a varda l’àuta nen come na nemisa, ma come na seure. Përchè a l’é parèj. ‘L Brav’òm a canta ‘d canson ch’a l’ha fàit chiel ma le paròle a son surtije da na coltura ch’a l’é nen sempe sempia e ch’a varda ‘n àut, sposand soens ëd termo e d’ideje ch’a smijo ‘d n’àut mond. Sto librèt bin cudì a-j fa onor e a na fa na mistà dle Langhe pì gorëgne. Mi son stàit content ëd conòss-lo e ‘d colaboré con chiel, convint che le përson-e generose a l’abio sempe na marcia ‘n pì. ëd Giovanni Tesio - da TORINOsette dLa Stampa dij 21 d'otóber dël 2016

Indietro