Gianni Oberto Tarena

A l’ha fàit franch bin ël Consèj regional dël Piemont a dediché un dij sò sacociabij (I tascabili di Palazzo Lascaris) a na figura d’un polìtich piemontèis, un galantòm, ch’a l’ha dedicà soa vita e sò travaj al Piemont, a le montagne, ai poeta e scritor piemontèis. I parloma ‘d Gianni Oberto Tarena (Bròsso, 9 dë stèmber 1902 - Ivrèja, 12 ëd gené 1980), un dij “padri fondatori” dla Region, president dël Consèj e peui President dla Region Piemont. A na scriv la biografia ant le pòche pagine dël sacociabìl n. 67 (pp. 32, 2016) Gustavo Mola di Nomaglio, ch’a pija l’andi dal Centro e dal Premio Gianni Oberto, istituì da la Region për ancoragé ij giovo a la coltura dël teritòri e destinà a Tesi ‘d laurea ch’a studio la lenga, la stòria, la literatura, ‘l teatro piemontèis. Gropà al Canavèis e a la montagna, a chiel a l’é antitolà la Biblioteca dla Montagna ‘d Ceresòle Real. A noi an fa piasì arcordelo ‘dcò coma apassionà dij nòsti scritor: a val la pen-a arcordé ij sò scrit su Carlo Botta, Guido Gozzano, Giovanni Cena, Costantino Nigra, e d’àutri, e pì che tut sò amor për Nino Costa… antant a s’ocupava dël Tunnel dël Frejus (col dl’autostrà), dël Parch Nassional dël Grand Paradis, dij Piemontèis ant ël Mond, ëd giornaj, ‘d politìca, e via fòrt. Aldo Viglione, ‘l President dla Region ant l’ani ‘d soa mòrt a l’ha ricordalo come “uomo profondamente onesto, di forte impegno per una gente ed una terra che amava”. d'Albina Malerba - da TORINOsette dLa Stampa dij 28 d'otóber dël 2016

Indietro