Comità për la Salvavardia dij Patrimòni Lenghìstich

Dòp Milan e Roma, st’an a l’é tnusse a Turin la riunion dël «Comitato per la salvaguardia dei patrimoni linguistici», un Comità nassional che da diversi ani a l’é angagià për porté a l’atension dël Parlament la situassion dle lenghe locaj, an particolar ëd cole ch’a son nen sota la tua dla Lege 482 për le minoranse. A fan part dël Comità tanti giovo motobin an piòta ch’a ven-o da le diverse part dl’Italia e ch’as rassegno nen a lassé andé an malora un patrimòni amportant. Scotand ideje e inissiative dj’àutri i son rendome cont che ij piemontèis da tante mire a son motobin anans ant l’angage. Miraco as nòta meno përchè noi soma fàit parèj, is genoma, e përchè l’anformassion a l’é ‘ncor un pòch andaré su ste ròbe; miraco da d’àutre part as sent pì parlé «l dialetto», ma më smija nen che an d’àutre region a l’abio giornaj o arviste, come ad esempi «La Slòira» e «Piemontèis ancheuj», tute scrite an piemontèis che a continuo a seurte con soa sabauda pontualità; stagion teatraj ant tut ël Piemont ch’a vempo sempe ij teatro; lìber, agende, armanach, sit internet, blògh, concors, premi….; la neuva ‘d n’asienda ch’a fa soe bustin-e ‘d sùcher con paròle piemontèise, boteghe con j’ansegne dij mësté, musicant, sansonié, poeta e prosador e la lista a sarìa longa. Sensa parlé dij travaj sientifich, penso al Repertorio Etimologico Piemontese-REP, na ciadeuvra che tuti ij piemontèis a duvrìo avèj an soa ca. Lòn ch’an manca? An manca un pòch ëd coragi, un pòch d’orgheuj, e na frisa d’atension dai Podèj. d'Albina Malerba - da TORINOsette dLa Stampa dij 25 ëd novèmber dël 2016

Indietro