Vijà - Paròle dl'ànima

Come da tradission consolidà, a l’ansëgna dij vers dla poesìa «Natal» ëd Renzo Gandolfo («…E Natal l’é Natal/festa ciàira, lusenta,/ sensa temp, sensa màcie lontan-e:/ d’un ancheuj, che a smija ‘n sempre,/ la caden-a as fa scala/ për che i cheujo ‘l boneur…»), la Ca dë Studi Piemontèis a organisa ‘dcò st’ani la Vijà ‘d poesìa e mùsica: «Paròle dl’anima», dedicà a la memòria d’Agar Pogliano. Ël randevó a l’é ant la Real Cesa ‘d San Lorens an piassa Castel a Turin, lùn-es 19 dë dzèmber a eut e mesa ‘d sèira. Protagonista: Enzo Vacca (arpa celtica e vos) e Arianna Ferraudo (vos); e le poesìe ‘d Gianrenzo P. Clivio, Bianca Dorato, Nino Costa, Pinin Pacòt e d’àutri poeta ch’a l’han lassane soe paròle për ël Natal, lesùe da Albina Malerba e Giovanni Tesio. La Vijà 2016 a seurt ëd tùa përchè a fa 18 ani ‘d vita: anandiasse quasi për azar ant lë dzèmber dël 1998, al Teatro Carignan, la «Vijà piemontèisa», a l’é dventà ant j’ani na bela tradission, ch’a fa festa, che la gent a speta, come tute le ròbe sempie e bele. Vijà, «veglia», për sente ‘l Natal con le vos dla poesìa e dla mùsica che da sécoj a parla an piemontèis, ch’a veul ëdcò esse na festa dla speransa, dl’arcòrd, dla continuità e dl’arnassensa, sicur che le paròle a son nen mach segn o fià, ma a l’han n’anima e na stòria antica. La plaquetta con ‘l programa e l’antologìa poetica as peul tiresse giù dal sit http://www.studipiemontesi.it. Anformassion: tel. 011/537486; mailto:info@studipiemontesi.it. ëd Giovanni Tesio - da TORINOsette dLa Stampa dij 16 dë dzèmber dël 2016

Indietro