Ij Brandé e Attilio Spaldo

An costi di a son stàit selebrà con na bela manifestassion an Palass Sisterna ij 90 ani dla publicassion dël prim nùmer dl'arvista piemontèisa "I Brandé"(5 mars 1927); ch'a sara dòp sinch nùmer e a arpija con 'l tìtol "Ij Brandé. Giornal ëd poesìa piemontèisa" 'l 15 dë stèmber 1946. Dal n. 2, 1 d'otóber 1946, a ancamin-a soa colaborassion Attilio Spaldo, 'l "pì giovo" dij "vej poeta piemontèis", coma la fija Laura a arcòrda ch'a lo defìnìa Arrigo Frusta, quand che la Companìa dij Brandé con Pinin Pacòt e la neuva nià dij poeta as angiava për la bataja leterarìa për arnové, deje neuva sàiva, neuva vita a la poesìa piemotèisa. Attilio Splado a l'é stàit n'"ativista" dla Companìa, un 'd coj che nen mach a scrivìa poesìe, ma as tirava su le manie për giuté Pacòt a fé 'l giornal. Un testimòni discret, un galantòm d'antan. Adess che cola stagion ëd boneur as peul mach pì les-se ant le stòrie dla leteratura, a vint'ani da la mòrt (14 ëd mars 1997), la presensa d' Attilio Spaldo a l'é afidà a soe poesìe: na poesìa raira, squisìa, con "soa gentilëssa 'd sentiment, ch'a sa esprime con discression dlicà, con misura eleganta; con sò amor për le còse bele". Lo ricordoma con l'anvit a lese soe poesìe goernà ant la racòlta:"L'Amorin dësmentià" (Turin, Ij Brandé, 1951, sconda edission slargà: Ca dë Studi Pinin Pacòt-Edission "Piemontèis Ancheuj",1996). d'Albina Malerba - da TORINOsette dLa Stampa dij 17 ëd mars dël 2017

Indietro