Beppe Sinchetto - «La cabassa dj’arcòrd»

Dòp che për na sman-a i l'oma dësmorasse da matin a sèira ant ij lìber, për l'edission ch'a l'ha fàita tranta 'd nòst fiamengh Salon Internassional dël Lìber Turin, an fa piasì ancora parlé 'd lìber, ch'a son parèj dle cirese, na pagina a tira l'àutra e un lìber a na tira n'àutr …I segnaloma un travaj 'n pòch divèrs: na sòrt d'autobiografìa an piemontèis, ch'a mës-cia ansema poesìa e pròsa, dl'ingegné-poeta Beppe Sinchetto: "La cabassa dj'arcòrd" (EEE-book, 2017, pp.170, 12 euro). Sinchetto a l'ha passà soa vita ai pé dla colin-a 'd Moncalé, tra travaj, famija, passion për la montagna, angagi social; peui con la giubilassion a l'ha giontà na neuva fiama a lë sgranesse dij sò di: 'l piemontèis, la poesìa. Adess che j'ani a passo pì lest e 'l pass as fa pì dasiant, a l'ha sarsì ansema poesìa e arcòrd ëd vita e an la smon ant na cabassa 'd paròle: n'itinerari da la vita masnà, ij gieugh d'antan, le feste 'd na vòta, la guèra, la bici 'd seconda man, pan e salam, ai viagi an Merica për ël travaj…ij cit…j'anvod. Un mond ch'a goerna drinta 'd chiel e che adess a condivid con j'amis. d'Albina Malerba - da TORINOsette dLa Stampa dij 26 ëd magg dël 2017

Indietro