Augur ëd Bon Natal

A më smija che 'n ocasion ëd Natal a sia nen na còsa sbalià auguré a tuj ij nòsti letor, che miraco a son nen 'n baron, ma ch'an seguo con divossion, bon Natal con na poesìa, ch'i l'hai scrivù a pòsta, 'nt la speransa ch'a riessa a dì cheicòs ëd Natal, ma 'nt l'istess temp a fassa 'dcò sente 'l liam con ël Calvare. E donca, a tuj ij nòsti letor e ai letor 'd "Torinosette", e a chi "Torinosette" a lo fa, na smon-o una apress ëd l'àuta: "O fiòca, bianca seure, s'it ses bela/ ch'it ven-es a pose-te su mia guera/ cantand canson ëd pas, da ciaramela,/ e 'ndrinta 'd mi arnas Nosgnor ën tera. // A l'é 'n presepio con col aso e 'l beu/ ch'as buto a carëssé coj fijà 'l Bambin/ e doa a-i era il gèil a visco 'l feu,/ Maria e Giusep a vijo e a diso 'l bin. // Oh lo sai pro che peuj ij fiòch ch'a calo/ a ven-o pistrognà, fan paciarin-a/ ma cost a l'é 'l moment che j'ale a balo.// Doman sarà divers, se le farfale/ as poseran sla cros dël sò calvare/ ma 'ncheuj a l'é parèj, la gòj s-cioplin-a". A l'é mach ën sonettin, ma a serca 'd dì l'essensial: che chi a nass a meuir e se cola mòrt a l'é la mòrt ëd n'òmo special, tutun cola mòrt a l'é nen àut che tute 'l nòste mòrt d'òmo ch'a l'ha por ëd meuire 'n soferensa, ma che a Natal a vivo na sblùa 'd lus. Tut dit sensa fé 'd teologìa.. ëd Giovanni Tesio - da TORINOsette dLa Stampa dij 22 dë dzèmber dël 2017

Indietro