Studi Piemontèis - ann 46 - II

Doe vòte a l'ann, notissie da la Ca dë Studi Piemontèis e da la l'arvista ch'a-j dà da sempe lustr e sens përfond: mai manché a n'apontament che da quaranteses agn a ven onorà a l'é pa da tuj e a l'é pa soens ch'ancàpita. "Studi Piemontesi", scond fassìcol dl'agn quaranteses, a trata 'd tut lòn che 'l Piemont a rapresenta: lòn ch'ancapita, lòn ch'ha l'é 'ncapità, la siensa, l'art, la lenga, la literatura, tut lòn ch'a fa Piemont, ëndrinta e fòra. E a peul basté. Përchè sto nùmer sì a l'é dabon bondos e rich e s-ciass, ëncaminand da sò prinsipe: n'artìcol motobin documentà d'Andrea Merlotti 'n sij "sonetti piemontesi" 'd Vittorio Alfieri, tant ën italian coma 'n piemontèis, ënt l'età 'd Vittorio Amedeo III. Ma peuj 'ncora, da Pier Massimo Prosio, Alfieri e l'"Agamennone". E peuj Roberto Rizzo con De Amicis e 'n bel tìtol ën piemontèis, "Ah! Che paìs!", vis a dì le pagine african-e d'un - për ij sò temp - gran viagiator. E Andreina Griseri 'nt un viage pais për pais, e Badini Confalonieri con Croce e la critica literaria piemontèisa. Fin-a a rivé a Spanzotti e Guido Reni e di-je pròpe tuj a l'é 'mpossibil. Sempe pagine dël "Lessico piemontese" e dl'"Onomastica piemontese". E ritrat (sentenare 'd Giovanni Cena) e recension e notissie e segnalassion e via fòrt. ëd Giovanni Tesio - da TORINOsette dLa Stampa dij 16 ëd fërvé dël 2018

Indietro