L'arvangia dël "dialet" tra ij banch dë scòla

Su "la Repubblica" ëd merco 7 mars 2018, a pagina 25 ën tìtol ch'a peul nen ëstupì chi, come Albina Malerba e come mi, l'oma portà 'l piemontèis (bin intèis, nen mach noi) ën tante e tante scòle dël Piemont për almeno quindes agn, fin cand da la Region Piemont a l'é manca-ne l'agiut finansiare. Ma tornoma al tìtol: "La rivincita del dialetto fra i banchi di scuola" a firma d'Enrico Ferro e Ilaria Venturi, ch'a parlo dël Veneto, dla Liguria, dl'Emilia, dla Lombardia, dla Sicilia. Gnente dël Piemont, ma passiensa. Lòn ch'a conta a l'é ch'a-i sia na neuva (antica) sensibilità për la facenda, combin che la difidensa a sia 'ncora fòrta e tute 'l vòte 'ntoca torné a fortì che l'intension dla difèisa dle parlade locaj (e peuj gnanca tan locaj) a l'é na custion ëd siviltà. A l'é pròpe nen custion ëd difende na vision ëd vista curta, ma al contrare 'd difende 'n bin che vardand andaré a prepara 'l nòst doman e 'l doman dël doman. A l'é fin-a tròp facil campé via, dësfesse 'd lòn ch'a smija passà, nopà l'é pròpe lì 'l sens ëd tut. Na siviltà a l'ha damanca dla soa stòria për arziste al vent dël neuv a tuti ij cost. E su sòn i torneroma 'ncora a dì. Për costa vòta veuj mach dì ch'a conta për cheicòs che un gròss giornal a-j dedica na pagina antrega a la custion. Sperand che 'n Region Piemont a leso. ëd Giovanni Tesio - da TORINOsette dLa Stampa dij 16 ëd mars dël 2018

Indietro