Ij Balocco

Tranta, quaranta, tut ël mond a canta», a l’é ‘l tìtol, con sot tìtol “Canti e filastrocche del vecchio Piemonte”, dël lìber ëd Piergiorgio e Roberto Balocco, con CD inédit e spartì mùsicaj, publicà da Graphot (www.graphot.com; € 22,00), ch’a cheuj cole che ij doi grand “frej” dla tradission piemontèisa a considero, con bon-a rason e competensa, “fra le migliori gemme del folklore piemontese”. A son sinquanta canson: test an piemontèis, compagnà da la tradussion an italian e da lë spartì; des a son cole ch’as peulo scotesse ant ël Cd: da l’Oslin dël bòsch, a Baron Litron, a Zòlicheur për finì con la Corenta. La prefassion e la revision dij test an lenga piemontèisa a l’é ‘d Paolo Sirotto, ch’a fortiss lòn ch’a venta che ij piemontèis a torno a pijé a cheur che “la canzone piemontese non è seconda a nessun’altra tra le regione italiane”. E se as les con atension l’Introdusison dj’autor as fatiga nen a capì che a l’é nen mach n’afermassion ëd drapò localistich. Ma a venta che ‘l travaj dij frej Balocco e dij tanti angagià sla frontiera dla canson popolar e sia giutà e pijà ant la giusta considerassion da j’istitussion. “Si tratta - a concludo – di salvare il salvabile”, prima ch’a fasa neuit! d'Albina Malerba - da TORINOsette dLa Stampa dij 18 ëd magg dël 2018

Indietro