Tilèt dël Partì Comunista

Ebin, sì, a fa na certa impression lese che 'l "Manifesto del Partito Comunista" a l'é diventà, virà 'n piemontèis, ël "Tilèt dël Partì Comunista" (cudì da Sergio Notario e Simone Spaccasassi, pp. 64, euro 8, Zambon editore, con la colaborassion dla Ca dë Studi Piemontèis). Na certa impression për almeno doe rason. La rason nùmer un: ën temp d'arfluss polìtich, d'ideaj giumaj ciumì, d'ideje ch'a vardo al "particulare" e nen ëd sicur al vantage 'd tuj, tradùe 'l "Manifesto" giudico ch'a sia n'at ëd corage e 'd (bon-a) provocassion. La rason nùmer doi: sente e lese 'n piemontèis n'euvra ch'a varda a l'internassionalìsm dij proletare am fa pensé lòn ch'i l'hai se nen da sempe, 'd sicur da nen pòch temp pensà: che 'n piemontèis as peul disse e as peul parlesse 'd tut, combin che sòn ancapita pì 'n sla carta che 'nt la realtà, përchè tròpi (tròpi dabon) a son ij pregiudisse. Le doe rason a veul nen dì ch'a deubio sté a tuj ij cost ënsema. Ma a mi la (bon-a) provocassion m'ësmija dobia. Na dobia difèisa 'd cheicòs ch'a smiaj mòrt ma che a l'ha 'ncor rason ëd vive. Sensa conté che la letura dël Tilèt, ansema a le ideje ch'as professo lì tra Marx e Engels, ën certi passage a l'é 'ncora atual (pa na bëstëmia).. Sensa conté che lese 'l Tilèt ën piemontèis a l'ha fa-me sgarì specialmente ën col final da comisse: "Proletari ëd tùit ij pais, Unì-ve!". d'Albina Malerba - da TORINOsette dLa Stampa dij 28 dë stèmber dël 2018

Indietro