Dal Borgh al Bit

Lë sgnor dal parlé fin", a l'é 'l pì bel e s-ciass ritrat ch'a në smon Sergio Maria Gilardino, ëd Gianfranco Gribaudo, ant soa prefassion a lìber: Gianfranco Gribaudo, "Dal Borgh al Bit. Tra Torino e le Nazioni Unite: fatti e pensieri di un piemontese internazionale", soagnà da Luciano Genta për le edission Gaidano e Matta 'd Cher (edizioni@gaidanoematta.it, 2018, pp.243, €18). Ël lìber a l'é na biografìa contà travers na longa intervista 'd Luciano Genta a un monsù che tuti ij piemontèis a conòsso coma autor d'un dij dissionari dla lenga piemontèisa pì amportant e dovrà, ël "Dissionari Piemontèis" surtì ant la prima edission dël 1972, firmà ansema a Sergio Seglie, për le edission dij Brandé; vàire vòta ristampà fin-a a l'edission mach pì 'd Gianfranco Gribaudo, "Ël Neuv Gribàud. Dissionari Piemontèis" (Daniela Piazza Editore 1996). Ma Gribaudo, a la mòda d'un ver piemontèis d'antan, a l'é stàit tant e tant ëd pì. A l'é stàit un dij protagonista dl'angage antërnassional ëd Turin, prima fonsionare e poi dirigent dël Centro Internazionale di formazione tecnica e professionale per i paesi in via di sviluppo (che tuti a conòsso coma Bit). Për fesse n'ideja 'd Gianfranco Gribaudo piemontèis antërnassional a venta 'dcò lese la prefassion ëd Gian Giacomo Migone. Ëd Gianfranco, l'òm, ël piemontèis, a na dis tanto l'introdussion 'd Luciano Genta, "Un ritratto a cuore aperto". E a l'é stàit pròpe Genta a fé da levatris al lìber. Un boneur për tuti noi, për Turin e për ij piemontèis, ch'i podoma lese coste memòrie d'un monsù dal deuit fin…d'un piemontèis ëd marca franca. d'Albina Malerba - da TORINOsette dLa Stampa dij 19 d'otóber dël 2018

Indietro