Studi Piemontesi 2018

Nùmer dë dzember 2018. L'arvista "Studi Piemontesi" a l'é rivà pontual a Natal e për la fin ëd l'an. Nùmer bondos, nùmer satì. Nùmer, come sempe, dedicà a le materie pì diverse ma antërsà drinta n'ëspassi regional precis, ël Piemont, e tutun n'ëspassi ch'a sa 'ndé bin dëdlà dla soa geografìa. L'é nen sicur ën cas che l'arvista a-i sia 'n tante e tante biblioteche dle Università forëstere, fin-a ai paìs pì lontan. Stavòta art e stòria a l'han fàit la part dël leon, combin che - tan për dì - l'artìcol ch'a deurv ël nùmer e ch'a varda a Guarino Guarini a sia rìch ëd considerassion ëd matematica e 'd geometria. E donca Guarino Guarini , ma 'dcò 'n bel ritrat ëd la marchesa Enrichetta Guasco di Bisio Carron di San Tommaso. E peuj tante le "Note", da Michelangelo Garove ai Piffetti, da Nico Orengo, client dël barolista Martinelli, a l'"Onomastica piemontese" (rivà al nùmer eut ëd la serie, na gòj), al "Lessico piemontese" (rivà al nùmer tre, n'àuta gòj), për nen dì dël ritrat ëd Francesco Franco ch'a l'ha scrit l'architet Mamino, e tanti document e inédit: ëd Silvio Pellico e dij Villamarina. Për rivé a la part nen pòch galupa dle recension e 'ncora 'd pì dle notissie. Chi a l'é 'nteressà, basta telefoné a la Ca dë Studi Piemontèis (011-537486, o vardé 'l sit:www.studipiemontesi.it). ëd Giovanni Tesio - da TurinSet ëd La Stampa dij 25 ëd gené dël 2019

Indietro