Piture parolà

A foson-a e a fioriss sempe pì arbiciolùa la stagion poetica an lenga piemontèisa (ant la koinè - a dis - arsentà ant soa parlada rustica) 'd Giovanni Tesio, che as segnala viaman nen mach come un djë studios pi avosà 'd leteratura, ma coma poeta e scritor ëd sò. Ij sonèt publicà an doe racòlte a l'han ëdcò 'l merit d'avèj contribuì nen pòch a arnové e spantié l'interesse për nòsta tradission leteraria. Soa msùra sperimentà e cudìa a l'é 'l sonèt; e sonèt a son coj dla neuva racòlta ch'a seurt adess a Noara da Interlinea: "Piture parolà. Arte in poesia" (pp. 128, € 12), con na nòta, an italian, dë Stafano Lanuzza. A son sent sonèt an piemontèis ch'as fan paròla për sent piture. N'ambostà 'd vers ch'a seurto da na vision artistica 'd color e segn e seugn e leu e figure, campà a l'azar, sensa n'ordin cronològich, mach goernà da l'emossion ch'a s-ciòd dëdnans a na mistà e as fa paròla. Chagall, Mollino, Goya, De Chirico, ma 'dcò ij Tabachèt dij Sacri Monti, Ermanno Olmi, Ugo Giletta, Lalla Romano, Teresita Terreno e Gianfranco Schialvino, Hayez, Pinot Gallizio, Van Gogh, Zorio, Lotto, Giorgione… bësodià ant un-a andan-a 'd celesta anarchìa…Un "museo del mondo", na "pinacoteca dell'anima" ch'as cangia e a s'arpata an poesìa-color. "Ij color a son son, e mach ij son,/ ëd la paròla ch'as vira an mistà,/mistà sensa figura…/ son e color ch'a ven-o su dal poss". "Piture parolà" a sarà presentà giòbia 7 ëd fërvé, a 4 e mesa dël dòp disné, a la Fondazione Accorsi-Ometto, via Po 55, Turin. d'Albina Malerba - da TurinSet ëd La Stampa dël 1m ëd fërvé dël 2019

Indietro