Sërché l'òr an Piemont

A s’antìtola “L’eva d’òr. La vita di Giovanni Vautero, cercatore d’oro”, ‘l lìber, publicà da Impremix-Edizioni Visual Grafika ‘d Turin (pp. 108, € 13; www.impremix.it), che Lorenzo Zeppegno a dedica a conté le vicende dla vita e dël “mësté” ‘d Govanni Vautero (1929-2017), un sercador d’òr ant ël Canavèis, e an particolar a Feletto. Ël lìber a l’é scrit an italian, ma i lo segnaloma ambelessì përchè a l’é antramà ‘d piemontèis, a ancaminé dal tìtol: a Feletto eva d’òr a l’era ciamà ‘l fium Orco. La pësca a l’òr a l’é na stòria ch’a va andaré ‘d sécoj, un “mësté”, na passion, un “vissi” ch’as passavo generassion apress generassion, “quasi esclusivamente per via orale”. Ant le pagine a s’antërso la stòria cita d’un leu, con la stòria granda ch’a s’anfila ant la vita ‘d tuti ij di, ma sempe, guèra o pas, con l’Eva d’Or protagonista, sislà drinta al cheur. Coma a dis Giovanni “sono anziano ma tutti i giorni voglio vedere il mio fiume. …Questa è la storia di un pescatore d’oro, che non è mai diventato ricco, ma con il cuore in mezzo al fiume”. E as dev pròpi a Giovanni Vautero ‘l Museo dl’Eva d’òr ëd Feletto: dova as peulo vëdde j’atrass ch’as dovravo …e fin-a ‘d busche d’òr… d'Albina Malerba - da TurinSet ëd La Stampa dij 15 ëd Mars dël 2019

Indietro