Ij 50 agn dla Ca dë Studi Piemontèis

La Ca dë Studi Piemontèis, tra ij randevó che a organisa për festegé ij sò prim 50 ani d'atività a l'ansëgna dla "multidisciplinarietà" e për auguré a tuti bon-e vacanse, an anvita al "Concerto d'estate. Da le rèis për l'avnì. Musiche tradizionali del Piemonte e composizioni contemporanee", ch'as tnirà 'l 5 ëd luj, a 9 ore 'd sèira al Conservatori Giuseppe Verdi 'd Turin (piassa Bodoni). Protagonista l'Ensemble Pianà (Enzo Vacca, Martino Vacca, Simone Barbiero, Vik Noello), j' Amemanera (Marco Soria e Marica Canavese) e l'Orchestra Progetto Futuro Musica direta dal Maestro Aldo Sardo: tuti già angagià ant la Vijà 'd Natal che a l'avìa avù tanto rëscontr e lassà fòra tanti spetator. An programa canson e mùsiche dla tradission: da La Bërgera, a Vërdolin, a Doi anelin, a Monia mancà; e j'esperiense neuve dle poesìe 'd Bianca Dorato, Giovanni Tesio musicà da Enzo Vacca, a le canson A me manera, Sensa la lun-a, Ratin bandiera…dël repertori bin avosà 'd Marco Soria e Marica Canavese. Për ël Consert as paga gnun bièt, e as peul intresse al Conservatòri a parte da 8 e mesa 'd sèira, fin-a ch'a-i son ëd pòst. Ciamé anformassion al telef. 011/537486; info@studipiemontesi.it. Për ël programa complet dle mùsiche e dle canson vardé 'l sit: www.studipiemontesi.it. d'Albina Malerba - da TurinSet ëd La Stampa dij 21 ëd giugn dël 2019

Indietro