Inissiativa a Salern

Son pen-a rivà da Salerno, doa son ëstàit ënvità come poeta 'n piemontèis ënsema a tanti d'àiti poeta d'àute lenghe. Për fé còsa? Për fé 'l vir d'Italia dla poesìa ch'a parla 'nt ij dialèt o 'n cole lenghe ch'arzisto a la dësmentia (inùtil ch'i disa che tuj ij dialèt a son lenghe e tanto pì lenghe cand as fan poisìa). Ënsema a d'àiti quatòrdes poeta (quindes ën tut) l'oma fàit le nòste leture për la stra, tapa për tapa e peuj la neuit tra saba e duminica, tra 15 e 16 ëd giugn, l'oma vivù na neuit bianca tuta dedicà ai nòsti vers. Na bela inissiativa che cheicòs a l'ha pagà al color local ma nen pòch a l'ha arciamà a la custion mai finìa dla vitalità dle nòste parlade. L'oma fàit tuj con dignità la nòsta part e a l'é formasse lì na bela squadra, 'n bel consert ëd vos. Dal bisiàch giulian al catanèis, na bela partìa 'd sugestion che 'l publich (disom-lo con franchëssa) nen pròpe bondos, a l'ha tutun seguì con bela atension. N'ideja brilanta a l'é cò mnu-je a j'organisator: a dosent agn da "L'Infinito" 'd Leopardi, fe-ne tradùe col caplavor 'nt le nòste parlade. Còsa ch'i l'oma fàit, a dispet dji rubaton. E soma rubatà pa mal, ma l'oma nen arnonsià a prové. E 'dcò mi - con tuj j'artegn - l'hai fàit mia part. Ma peuss pa dì ch'i sia riussi-je. Ansi, a esse onest, m'ësmija d'avèj fàit na folairà. ëd Giovanni Tesio - da TurinSet ëd La Stampa dij 28 ëd giugn dël 2019

Indietro