Fausto Coppi

Dòp ij lìber an piemontèis dedicà a la stòria dla tragedia dël Grand Turin ("Mach ël destin a l'ha poduje fërmé. La storia del Grande Torino in lingua piemontese", 2018) e la stòria 'd Madama Juve ("A-i é gnun ëd pì che noi! Storia della Juve in lingua piemontese", 2019), Vittoria Minetti e Flavio Pieranni, sempe për ël midem editor, a pùblico "Fausto, un seugn ëdzora a doe rove. La stòria 'd Fausto Coppi an lenga piemontèisa" (Turin, Bradipolibri, 2019, pp. 109, ill., con tradusison an italian a front), prefassion ëd Paolo Viberti. Dodes tape da le "colin-e dzora Torton-a", dova "a-i é un paisòt che, a dì cit, a l'é ancora dì gnente", dova al 15 dë stèmber dël 1919 a l'é nassuje Fausto… fin-a a l'ùltima, quand a "neuv meno un quart dlë scond di dël 1960 Fausto a l'é partì për sò Grand Viagi". Tapa dòp tapa, vir dòp vir, salita dòp salita, corsa apress corsa, contà ant un piemontèis soasì, ant le pagine as dësròlo la vita, le imprèise, j'amor dël Campion ëd Castalanìa, "ansi l'Airon coma ch'a l'avìo batialo mersì a soa mòda 'd core an biciclëtta". E tante bele fòto ch'a compagno e a soagno un seugn piemontèis ant j'ani che la bici, 'l Gir d'Italia a amusavo e a passionavo tant la nòsta gent. Përchè, coma a scriv Viberti "Coppi a l'avìa daje a j'italian le veuja 'd torna comensé a soride".. d'Albina Malerba - da TurinSet ëd La Stampa dij 18 d'otober dël 2019

Indietro