Cadò 'd Natal

A Natal fé un cadò ch'a dura tut l'an e sempe, regalé un lìber piemontèis! Për anvité a regalé un lìber a Natal, ch'a l'é un dij gest pì bej - e miraco ancora bastansa a bon pat - ch' a fa bin e a resist ant ël temp, la Ca dë Studi Piemontèis a soagna na gran giojera 'd lìber sël Piemont e an piemontèis, stòria, poesìa, art, cusin-a… tanti tìtoj neuv e 'd catalògo, soens mal fé da trové ant le librerie. Coma sempe as trovrà 'l Calendari "Memòria dël temp" 2020, con gran bele fòto d'antan, dl'editriss Il Punto/Piemonte in Bancarella; 'l "Repertorio Etimologico Piemontese-REP"; e fresch fresch dë stampa 'l bel lìber "Na lòsna an fior", la racòlta dle poesìe an lenga piemontèisa 'd Gianrenzo P. Clivio (tradussion an italian e an inglèis), ch'a seurt a sislé le inisisative dij 50 ani d'atività dla Ca dë Studi Piemontèis. E peui tute j'autre edission veje e neuve dla Ca dë Studi; le poesìe 'd Nino Costa e vàire d' àutri tìtoj dl'editor Viglongo; edission dl'Araba Fenice, dl'Artistica Savigliano…e tanti, tanti bej tìtoj. Nen un mercà, ma n'itinerari d'anima e cheur, dë stòria, 'd paròle, inmagini 'd tut ël Piemont e dj'antich Stat Sabaud (dal 14 al 22 dë dzèmber; për anformesse dj'orari: tel. 011/537486; info@studipiemontesi.it; www.studipiemontesi.it). d'Albina Malerba - da TurinSet ëd La Stampa dij 13 dë dzèmber dël 2019

Indietro