Bon-e neuve

Bon-e neuve! Ant cost moment un pòch angavignà a peul esse bel e arfestiant trové quaiche bon-a neuva. E noi i l’oma na bela bon-a neuva da Mondvì, ch’i segnaloma dabon con tanta gòj. Massimo Maia da sempe a travaja ant ij lìber e librerìe, e fasende corage a l’ha duvertà na liberia tuta soa. Na librerìa special. A së s-ciama “Banco. Rivendita di storie. Libreria”. “Banco” a deurb a Mondvì an piassa Santa Maria Maggiore, ant na veja botega, sarà dal 1959!, dova a travajiava un tolé (antlora denominà piassa dij formagg). Jë scur a son restà lì anciodà fin-a a l’inver dël 2019, quand Massimo Maia a l’ha avù la veuja ‘d core l’arzigh ëd deurbe na librerìa, për fé conòsse lìber bej, anportant, coj che a treuvo nen pòst anti j pòst gròss…. Banco a dventa pòch a pòch un leu ‘d magìa gropà a la carta: lìber fòra ‘d catalogh, album ilustrà, manifest, disch ràir, ròbe d’antan ch’a peulo fé bele nòste ca… e un pòst për ancontresse, ciancé ansema, scoté mùsica, e magé… “con j’euj” e con ël cheur. E dova ‘d sicur as peulo trovesse ij lìber an piemontèis, dij nòsti poeta (e Mondvì a l’é sgnora ‘d poesìa e ‘d poeta: disoma mach chèiche nòm, Remigio Bertolino, Meco Boetti, Nicola Duberti…ma i peule trové ij lìber dle poesìe ‘d Giovanni Tesio, ‘d Gianrenzo Clivio, e as capiss, dij classich Pinin Pacòt, Nino Costa…). Un batiman a “Banco” e a Maia. Se i veule andé o anformeve: info@bancolibreria.it; tel. 01741921129. d'Albina Malerba - da TurinSet ëd La Stampa dij 6 ëd mars dël 2020

Indietro