Autri mond regionaj

Sempe ‘nt l’ideja che sì as trata pa mach ëd parlé ‘d còse piemontèise, ma ‘dcò d’àiti mond regionaj ch’a fan fradlansa con ël nòst (còsa ch’a l’ha sempe fàit, tan për fé n’esempe nen da pòch, Pinin Pacòt con sò e con ij sòj «Brandé»), sentoma d’àite vos, d’àite vos ch’a diso e an diso ‘nt le parlade pì locaj (lenghe, bin intèis, përchè sempe ‘d lenghe parloma, sensa neghé che la stòria dla lenga a l’é fàita ‘d tanti cambiament e ‘d tante gerarchìe ch’a son peuj cole ch’a fan le diferense ma ‘dcò le proprietà). Dit sòn, veuj sì dé notissia d’un lìber ch’a l’é rivame ‘n costi di. A s’ëntìtola «Lasciami il sogno» e a son le litre ch’a son scrivuse Biagio Marin e Anna De Simone ‘nt ël vir ëd tre agn (1982-1985). A cudilo a l’é Edda Serra, che ‘d Marin a l’é stàita l’editriss ëd tanti lìber. A publichelo a l’é l’editor Ponte del Sale ‘d Rovigo (pp. 324, euro 32). Litre motobin bele ch’a van da na letriss d’ecession e da ‘n poeta strasordinare ch’a scriv soa euvra ‘nt la parlada ‘d Grado, na parlada antica e aùssa, ch’a dis ëd mar, ëd lus, d’ëstagion, d’interiorità e ‘d religiosità. Tut linger e tut fòrt, con tanti poeta a le spale, da Dante ai mistich. Paròle come «sacrifisse», «miraco», «epifanìa», «trasendensa», «assolut» e via fòrt a son cole ch’a seurto da ste litre e ch’a son cole dla poesìa ‘d Marin. Gran lìber. ëd Giovanni Tesio - da TurinSet ëd La Stampa dël 1m ëd magg dël 2020

Indietro