Armanach piemontèis 2021

Pogieuj, trasse, lòbie e bovindo a Turin”, a l’é ‘l tema dl’Armanach Piemontèis 2021!, dl’Associassion Moginevro Cultura, edission “Ël Torèt/Monginevro Cultura, soagnà da Sergio Donna, che gnanca ‘l diav-covid a l’ha ralentà, e che adess a l’é già rivane sla scrivanìa, a nonsiene speransa ‘d boneur për l’an ch’a vnirà apress a cost biset, che pì biset a pudìa nen arvelesse. A son 50 fiamenghe fòto ‘d pogieuj scatà da Carla Colombo, Vittorio Greco, Beppe Lachello, compagnà da articoj an piemontèis e an italian sl’argoment, ëd Piero Abrate, Francesco Albano, Luigia Casati, Sergio Donna, Achille Maria Giachino, Milo Julini, Anna Perrini. N’itinerari da fé an flanand për la sità, për dëscheurve architeture (e stòrie) ch’a ancanto, coma, tra le tante, la Ca Fenoglio-Lafleur ëd via Principi d’Acaja con sò dopi bovindo (a na scriv Julini), o ij pogieuj dla Falchera (‘d Luigia Casati), o ‘n contrà ‘d Pò, fin-a a la trassa dla Caserma Amione, passand për Palass Paesana, Palass Piotti an Cor Vitòrio Emanuele…tra centro stòrich e barriere. Come sempe l’armanach a pòrta tuti ij Sant patron ëd sità e pais dël Piemont, 365 proverbi sernù da Sergio Donna e Giuseppe Novajra, e ‘l test e spartì dla canson “Pogieuj”, mùsica ‘d Novajra e paròle ‘d Donna (ciamé a: ufficio.stampa@monginevrocultura.net; www.monginevrocultura.net). d'Albina Malerba - da TurinSet ëd La Stampa dij 26 ëd giugn dël 2020

Indietro