Pietro Massia

Ël nòm ëd Pietro Massia (Turin, 1m ëd luj 1871 – 7 ëd novèmber 1945), combin che ancheuj a sìa pòch conossù dal pùblich, a l’é anvece bin avosà ant ël mond djë studi d’onomastica e topònomastica piemontèise, e ij sò travaj a resto un pivò për chi s’anteressa an manera sientifica a coste materie, che sempe ‘d pì però a piaso e a anciarmo tanti. Massia a l’é nen stait mach n’ «erudito», përchè dal 1944 a la mòrt a tnisìa su « La Gazzetta del Popolo », na rubrica ‘d tòponomastica turinèisa, ch’a sotsignava coma «Doctor Beta». Ai travaj e a l’importansa dla figura ‘d Pietro Massia a-i seurt adess un lìber soagnà da Alda Rossebastiano, Elena Papa e Daniela Cacia, ant la « Colanna di studi di toponomastica italiana » dl’edission dell’Orso (pp. 293, € 30), « Sulle orme di Pietro Massia. Strumenti e metodi per il rinnovamento della ricerca onomastica », ch’a cheuj ij testi dl’ancontr dë studi dël 2017 organisà dai docent dël Dottorato di Onomastica. Ël convegn a l’ha pìa la sbruvëtta da la cession dla biblioteca dël professor Massia al «Centro Studi e Ricerche di Onomastica», ant cost moment ospità dal Dipartimento di Lingue e Culture Moderne dl’Università ‘d Turin. Doi arcòrd a deurbo ‘l lìber : Gian Savino Pene Vidari «Pietro Massia e la Deputazione Subalpina di storia patria», e un ritrat dl’anvoda, Sofia Massia ch’a l’ha fait cadò dla biblioteca ‘d sò Ce a l’Università ‘d Turin. d'Albina Malerba - da TurinSet ëd La Stampa dij 24 ëd luj dël 2020

Indietro