Ël Musé Egissi an piemontèis

An costi temp maloreus a giuto a ten-e ansema le përson-e, ch’a peulo pì nen radunesse e sté ansema për condivide na conferensa e gnanca na partìa a ciance, tante inissiative virtùaj. Tuti a serco d’ansighé j’amis, e magare slarghé ij contat, con video, mail, film e via fòrt. L’inissiativa pì anciarmanta për noi a l’é cola dël Museo Egizio che a l’ha avù l’ideja ‘d realisé eut “clip” për conté la stòria ‘d përson-e ch’a l’han fàit l’imprèisa ‘d porté a Turin tuta cola “ròba dl’àutr mond”, che ancheuj a fan ëd nòst Museo ‘l pì avosà e frapant. Da tute bande ‘d Piemont, un-a për provinsa, a son staje ‘d figure ch’a l’han fàit soa part: nòbij coma ‘l Cordero San Quintin dël Mondvì e Carlo Vidua cont ëd Consan (Lissandria), ma ‘dcò borghèis coma j’Ottolenghi d’Ast, ij Molli ‘d Noara, Giuseppe Botti ‘d Vanzon (Verban Cusio Ossola), Ernesto Schiaparelli dij Cep ëd sota (Occhieppo, Biela), Bernardino Drovetti ‘d Barbania (Barbanià coma a dirìo lor), Virginio Rosa ‘d Varal (Vërsèj). Ma la ròba pì bela a l’é che coste stòrie ‘d vita a son contà an lenga piemontèisa, con sot tìtol an italian. Mersì al Museo Egizio ch’a l’ha avù ‘l “corage” ‘d lansé costa inissiativa con la colaborassion dla Ca dë Studi Piemontèis e la tùa dla Region Piemont. Tuti ij màrtes, fin-a al 22 dë dzèmber (basta coleghesse ai sit www.museoegizio.it o www.studipiemontesi.it, o serché su YouTube “Dalle Alpi alle Piramidi. Piccole storie di piemontesi illustri”). d'Albina Malerba - da TurinSet ëd La Stampa dij 13 ëd novèmber dël 2020

Indietro