Augure 'n poisìa

Come 'n tuj j'agn serco 'd fé a chi a les le nòste paròle – veuj dì cole che Albina Malerba e mi sërcoma 'd dì për ten-e bon-a cola lenga viva ch'i pensoma a sia 'ncora 'l piemontèis – ij mè augure 'n poisìa: che peuj, lassoma sté, i é pa 'd pretèise ch'a sia pròpe poisìa, ma tutun cheicòs ch'a j'ësmija a peul basté. E alora cò st'agn sì, l'hai scrivù 'n sonèt e spero ch'a dëspiasa nen: «    L'é nà, l'é nà a la vita 'd l'univers col cit – ma che gran cit – ch'a l'han nonsià dal temp dij temp tuj ij profeta spers ëd vive drinta 'l poss ëd la vrità.    Se a l'é sempe 'l tut da 'ncaminé come ij nòsti quaderno da scolé giusta 'l Natal an dis che col Bambin a l'é nòst Salvator, ël nòst barbin.    A l'é l'agnel ch'a ven për dine che a esse òmo 'd bon-a volontà rason a basta nen coj sòj përchè    ma che 'ntoca campesse 'nt l'onda, 'n mar e lì 'ntoca noé a gran brassà e che sossì a fa nen për chi l'é avar». Ij temp a son nen dij pì tranquij, ël covid 19 a l'ha dëstornane e an dëstorna nen pòch, tante le person-e ch'a son mancane e 'nt la manera pì bruta, e tante le dificoltà ch'an sagrin-o. Ma Natal a l'é bin sempe Natal e la nassita a l'é bin sempe n'arnassita. Passiensa s'i podoma nen trovesse come sempe e s'i duvoma fé 'n pò 'd sacrifisse se a sta a noi fé dë sto Natal ën bon e pì përfond Natal. ëd Giovanni Tesio - da TurinSet ëd La Stampa dij 18 dë dzèmber dël 2020

Indietro