Bernardino Ferrero

Carlo Bernardino Ferrero (Turin, 1866-1924), a l’é në scritor piemontèis pitòst dësmentià (për boneur vàire sòi romans a son stàit publicà da Viglongo), ma a l’ha contribuì motobin a la vita dël giornal “’l Birichin”, che për quarant’ani a l’é stàit palestra e vos dla poesìa piemontèisa. Dël “Birichin” Bernardino a pija le rëdne dël 1888 e ai ten bin samblà fin-a al 1896. Ant le antologìe o ant jë studi ‘d leteratura an géner (ma un-a a ripet l’àutra), jë scritor dël « Birichin » a son un pòch considerà come poeta «bicerin», vis a dì poeta dla duminica. A j’ero sicur ën pò barivej, o «bele màcie» (coma a scriv Renzo Gandolfo), ma a l’ero j’ani dla bela época, na stagion ëd disincant e ‘d disimpegn, e quarant’ani ‘d vita d’un giornal a son nen bale ‘d fum; se peui as considera che pròpi da le pagine dël « Birichin » a ven fòra la vos àuta ‘d Nino Costa, mi i chërdo che na riflession, na riprèisa dë studi a sìa pròpi ora! An da l’andi a parlé ‘d Bernardino Ferrero un lìber soagnà da l’anvod, Enrico Maria Ferrero, « ‘L delit ‘d via dla Palma » (publicà con Amazon ISBN 9798578489334), con na bela prefassion ëd Milo Julini, ch’a definiss Bernardino «il piccolo Zola piemontese». As trata d’un romans curt, publicà a pontate sël «Birichin» dal 1890 al 1891. Enrico Ferrero a na dà ‘dcò a front la tradussion an italian, ch’a giuta chi ‘l piemontèis a lo capiss nen vàire bin. N’operassion dabon amportanta. Na bela ròba! d'Albina Malerba - da TurinSet ëd La Stampa dij 5 ëd mars dël 2021

Indietro