Cors ëd piemontèis

La notissia bon-a a l’é che ‘dcò për l’an académich 2020-2021 as ten a l’Università ‘d Turin ël “Laboratorio di piemontese”, vorsù da la Ca dë Studi Piemontèis mersì a un finansiament privà dedicà. Ël darmage a l’é che ‘dcò st’an as tnirà online, fasend manché coj moment ëd rapòrt përsonaj che tant a conto tra ij giovo. A son già squasi 60 jë student ch’a son marcasse: lession tuti ij giòbia e tuti ij vënner da doi bòt a sinch ore. A l’é për jë student dla laurea magistral an “Scienze Linguistiche del Dipartimento di Studi Umanistici”. Ël “laboratòri” a l’ha coma tema: Gramatica dël piemontèis; e Pròsa piemontèisa dël Neuvsent: “Pan’d Coa” ‘d Nino Autelli, soagnà da Nicola Duberti, bin conossù sia ant ël camp djë studi filològich e dialetològich, sia come poeta an piemontèis, ch’a fa arferiment a la “scòla” poetica monregalèisa. Mentre Lorenzo Ferrarotti a traterà la “Farsa di Zohan Zavatin” ëd Giovan Giorgio Alione, sla carsà dël Proget dl’edission filològica dle “Farse” dël grand poeta Stesan, ch’a l’é an tren ëd fé, ‘dcò con la colaborassion dla Ca dë Studi Piemontèis, a sinchssent ani da la prima publicassion. Info: Laboratorio di piemontese – Corso di laurea magistrale in Scienze linguistiche – Università degli Studi di Torino (unito.it). d'Albina Malerba - da TurinSet ëd La Stampa dij 14 ëd magg dël 2021

Indietro