da l'Argentin-a

Bon-e neuve da l’Argentin-a! Organisà da la FAPA (Federacion Asociasiones Piemontesas Argentinas, pressident Edelvio Sandrone), as ten l’11, 12, 13 ëd giugn, “virtualment”, ël Congres Nacional Asociaciones Piemontesas ch’a fa 6, prim Expo Congreso Internacional Virtual, con la colaborassion dla Region e dël Consèj regional dël Piemont e dl’Associassion Piemontesi nel Mondo. N’esperiensa neuva, che, a vëdde dal programa bin s-ciass, a pudrìa fin-a fé scòla. A-i son jë stand dla Region e dël Consej, dl’Associassion Piemontesi nel Mondo, dla Ca dë Studi Piemontèis, në stand “Monumeti e piazze”; a-i son mostre d’art, presentassion ëd lìber, na sala dla “Fradlansa”, për ij pòst binelà tra Argentin-a e Piemont, ancontr istitussionaj për student, scòle ‘d gastronomia, comersi e un bòrdel ëd ròba anteressanta. E, soagnà da l’Asociación Civil Mujeres Piemontesas de la República Argentina (AMPRA), ‘l 12, a-i sarà un Rëscontr dedicà a la lenga piemontèisa, mersì a l’angage ‘d Laura Moro, Ana Maria Filippa e Alejandra Gaido, për cheuje le testimonianse dij travaj për ël piemontèis ch’as pòrto anans ant tuta l’Argentina. Ël 13 a-i sarà n’omagi a Michele Colombino, pressident dl’Associassion Piemontesi nel Mondo. http://www.expocongresopiemonte.com.ar. d'Albina Malerba - da TurinSet ëd La Stampa dij 11 ëd giugn dël 2021

Indietro