Roberto Balocco

A l’ha coma tìtol “55-80. Tut ël Piemont at canta”, ‘l tilèt ch’a anonsia, për inissiativa dla Companìa për la difussion ëd la coltura piemontèisa “Arte ci pare” (president Paolo Sirotto), la festa piemontèisa për ij 55 ani ‘d carriera e j’80 ani ‘d Roberto Balocco. Roberto, con ël frel Piergiorgio, a l’é sicuramente un grand dla tradission piemontèisa, tra ij pì angagià sla frontiera dla canson popolar con travaj d’arserca sle canson dël passà lontan e pì davsin come le “Canson dla piòla”, ma ‘dcò le canson dl’Isler e ‘d Broferi. Travaj che ij doi frej a l’han presentà ant un bordel dë spetàcoj, ‘d CD, ëd lìber, sempe avend drinta al cheur la cossiensa che “la canzone piemontese non è seconda a nessun’altra tra le regione italiane”. La festa as tnirà vënner 25 ëd giugn, a l’Educatorio della Divina Provvidenza (cors Trento 13), da sinch ore dël dòp disné fin-a set e mesa dla sèira. A feje festa a Roberto a-i sarà ‘l frel Piergiorgio, e ansema a conteran ël travaj e l’amor për la tèra e la coltura piemontèisa; e a-i sarà, a rende onor a costa longa militansa për ël Piemont, l’Assessor regional a la coltura Vittoria Poggio. La festa a andrà anans con l’omagi a Balocco dij Trelilu; Matteo Ganci e la Cricca dij Mës-cià. Për partessipé venta prenotesse al 3470611416, opura scrive a info.artecipiemont@gmail.com. Tut a sarà registrà e as pudrà peui vëdde sij canaj sociaj dl’Associassion. Auguri Roberto! E sempe an brando! d'Albina Malerba - da TurinSet ëd La Stampa dij 25 ëd giugn dël 2021

Indietro