Gavada

Chèiche sman-e fa i l’hai parlà dle litre da le përzon fassiste ‘d Monti, ‘d Mila e ‘d Foa e dle tante paròle piemontèise che lor a dovravo mës-cià con l’italian. I torno a parlene ‘ncheuj përchè a-i é ‘n passage ‘n t’un-a litra ‘d Foa ch’a l’é motobin anteressant. Foa a conta d’avej avù na discussion con Alfredo Perelli antorn a la possibilità che ‘n piemontèis as peussa parlesse ‘d filosofìa. Perelli a dì ch’a l’é nen possìbil e Foa a dì ‘l contrare. An particolar Perelli a negava ch’as pudijssa disse – come nopà Foa a fortìa – n’espression come «concet pur» o ch’as pudijssa disse «slans» ën relassion a l’«élan vital» ëd Bergson e che Perelli a rija fin-a a le lacrime a sente dì «spirit assolù». E via fòrt. Bela custion. E noi da che part ësté? Sarai bin ciair. A mi am piasrìa tan esse con Foa, përchè i-j veuj bin al piemontèis come a l’italian, ma peuss nen deje tòrt a Perelli. Për maleur as peul nen dëstòrze ‘l cors ëd la stòria e fé finta ‘d gnente. Sicur che ‘l piemontèis a l’abia tute le carte a pòst, ma ‘dcò sicur ch’a peul nen fé come i salmon ij sàut ën àut. An teorìa tut as peul fesse, ma ‘n pratica ‘ntoca ten-e cont che l’impossìbil a esist. Piemontèis e italian a l’han avù doe diverse stòrie e a son magara antërsasse, ma a l’han viagià ‘n doi binare divers. E la vòta ch’a-i ven i sercheraj ‘d dì ‘n che binare… ëd Giovanni Tesio - da TurinSet ëd La Stampa dij 2 ëd luj dël 2021

Indietro