Armanach piemontèis 2022

Luj, alfin, l’istà ch’a pija la sbruvëtta e an buta na frisa d’alegrìa! E a gionté un pòch ëd gòj a-i riva Sergio Donna con l’Armanach Piemontèis 2022!, “con soe pagine patinà e soe anciarmante fòto d’autor”, publicà come sempe da l’Associassion Monginevro Cultura, edission “Ël Torèt/Monginevro Cultura”, sempe an piemontèis e an italian, dedicà sta vira ai “Giardin ëd Turin. Stòria, ancontr e legende”. Na belà anfornà d’aria pura e mossanta. A son 50 fiamenghe fòto ‘d parch e giardin turinèis scatà da Carla Colombo, Vittorio Greco, Beppe Lachello, compagnà da j’articoj ëd Piero Abrate, Francesco Albano, Luigia Casati, Massimo Centini, Sergio Donna, Achille Maria Giachino, Stefano Garzano, Milo Julini, Anna Perrini. N’anvit a fesse tante spassigiade, mèis për mèis, ant le leje dij Giardin Reaj, ant ij Giardin Sambuy, ant le leje dl’Aiuola Balbo, al Valentin, l’Òrt Botanìch, ij Rampar…fërmesse un moment ai Giardin Cavour al monumet a Panin Pacòt…”la pera ch’a dura”… Monté su vers la Madlen-a, o Villa Genero, ma ‘dcò al Meisin, al Colonnetti, al Sangon, a la Falchera…. a la Tesorera, al Michelotti arlongh a Pò, ‘l Valentin Neuv… Come sempe l’armanach a pòrta tuti ij Sant patron ëd sità e pais dël Piemont, 365 proverbi sernù da Sergio Donna e Giuseppe Novajra, e ‘l test e spartì ‘d na canson: “Ël torèt cantarin”, mùsica ‘d Novajra e paròle ‘d Donna (info: segreteria@monginevrocultura.net). d'Albina Malerba - da TurinSet ëd La Stampa dij 9 ëd luj dël 2021

Indietro