Musé Pietro Micca

"La Fojada guardé bin,/ I lasroma pa pié Turin./ Con le vòstre canonade/ Fei pa por a le masnà./ Batì pur la sitadela, Che Turin a s’guarnerà”: a son ij vers d’un-a antica canson popolar cuija da Costantino Nigra ant l’Eutsent, ch’a arcòrda l’assedi e la liberassion ëd Turin dël 1706, che Turin a arcòrda an costi di, con tante inissiative. E tante inissiative, visite guidà, ‘dcò an piemontèis, mostre, conferense…, a son organisà (fin-a a dzèmber) dal Museo Pietro Micca, che st’ani a taja ‘l traguard dij 60 ani d’atività, vist ch’a l’é stàit inaugurà (për volontà ‘d Guido Amoretti) pròpi për le manifestassion d’Italia ’61. Noi voroma arcordé la stòria ‘d Pietro Micca e dl’Assedi sitand la bela antologìa ‘d test dë scritor an piemontèis, an fransèis e an italian (da Saint Simon a Raby, da Edoardo Calandra a Guido Gozzano, da Vittorio Bersezio a Marziano Bernardi a Umberto Eco, ecc.), soagnà da Pier Massimo Prosio, «Vittorio Amedeo, Prinz Eugen, Pietro Micca: l’assedio di Torino visto dagli scrittori», con n’introdussion ëd Luciano Tamburini, “Da Micca a Porthos” (pp.84), publicà vàire ani fa da la Ca dë Studi Piemontèis. Ant ël lìber i trovoma antologisà ‘l Tarizzo dl’”Arpa discordata”, Alberto Viriglio, Nino Costa, Arnaldo Soddanino, Carlin Tiochet, e d’àutri, e fin-a col Filippo Tartufari, un poeta roman a Turin, amis ëd Còsta e d’Olivé. “Ma a la seira/trionfant/ Con ël Prinsi Eugeni acant/ Va soa Altessa Real a ringrassié/ Dë la vitòria Domnedé”. d'Albina Malerba - da TurinSet ëd La Stampa dij 3 dë stèmber dël 2021

Indietro