Censin Pich

Censin Pich, scritor, poeta, Brandé angagià sensa sosta, a l’é mancà a Turin ël 4 dë stèmber a 91 ani. Tra ‘d noi a bastava sò nòm a fé foson, a fé fiusa, a fene companìa, chiel ch’a l’era l’ùltima bandiera, l’ùltim drapò - l’ùltima ‘nsigna - dla tradission Brandé. Chiel che con soa firma cita (nòm come dëstin, pica pica, a picava sensa mai molé) a l’ha daje vita dël 1969, con d’èiti ‘d bon-a volontà, a la Ca dë Studi Piemontèis, e che peuj con “La Slòira”, e con Pasé, a l’ha continuà a cudì Piemont e piemontèis, dasandje vos a tute ‘l vos ëd poisìa che ‘nt ël piemontèis ëd tute part a disìo sò bin. Cudì ‘d premi (col ëd Canej su tuj), sapà sò tren, scuvrì teatro, butà passion, s-ciodù d’anlev e d’anleve, ch’a-j piasìo nen pòch. Censin a l’é stàit anima e cosiensa d’un mond che mai a l’é arsignasse a pensé mòrt. Magara ‘d vòte, ma dirìa sempe ‘d meno, a fasìa ‘n pòch tròp ël purista, e chèich vòte soma nen capisse dël tut (parlo për mi), ma ‘ncheuj ch’a-i é pì nen, sento che cheicòs ëd fòrt a l’é vnune a manché. A l’ha avù na vita longa e a l’ha fàit tanto travaj. E ora ‘ntocrà che nòste paròle ‘d cambrada e d’ëstima a resto nen mach paròle, ma veuja d’ëndé anans con ël travaj: cujne l’ardità, continuene la vocassion, arnovene ‘l giuss e ij santor. A l’é tut lòn che chiel a l’avrìa vorsù e che noi l’oma për consigna ‘d duvej fé. ëd Giovanni Tesio - da TurinSet ëd La Stampa dij 10 dë stèmber dël 2021

Indietro