Pont Canavèis

Na bela inissiativa a l’é cola ch’a s’ës-ciama an italian «Una fiaba per la montagna», ch’a l’é ‘nventasse l’associassion Péilacan ëd Pont Canavèis, dont a l’é pressident Michele Nastro. L’inissiativa a l’é giumaj rivà a vint edission, nen pòch. Duverta a grand e cit, anvita a scrive, da n’agn a l’àut, con argoment obligà, na fàula che peuj a ven giudicà da na giurìa. Disìa dl’italian, ma a-i é n’ëspassi riservà ‘dcò al franch-provensal e al piemontèis, e a l’é për sòn ch’i na parlo ‘nsissì. Tan për fé titoj e nòm st’agn la fàula ‘n franch-provensal ch’a l’ha vagnà e s’ëntìtola «1816. L’an chencha itsatèn» e a l’ha scrivula Enrica Guichardaz ëd Cormayeur, e la fàula ‘n piemontèis a s’ëntìtola «La masca Filo» e a l’ha scrivula Luigi Lorenzo Vaira ‘d Somariva dël Bòsch. Da dì peuj che coste fàule, ënsema a le tante ‘n italian scrite da le masnà dle scòle o da le përson-e d’età ma riche ‘d fantasìa as peulo lesse ‘nt ël lìber ch’a-j cheuj tute, bin cudìe da Gianfranco Schialvino e da Michele Nastro (e chi ch’a l’é ‘nteressà, basta ciamé a l’associassion ‘L Péilacan ëd Pont). La premisassion a viagia da pais a pais dle vaj Soana e dl’Orch e st’agn a l’é tocaje a Valprà (n’autr agn, sentenare dla nassita dël parch dël Gran Paradis, a-j tocrà a Ceresòle Real). Bin intèis, ël consors a l’é duvet a tuj, basta angagesse. ëd Giovanni Tesio - da TurinSet ëd La Stampa dj'8 d'otóber dël 2021

Indietro