Natal

E Natal l’é Natal, festa ciàira, lusenta… e a s’avsin-a a pass lest. Përchè ‘l Natal a manten-a cola magìa che tuti noi pì nen picinòt i portoma ant ël cheur, e ch’a sia nen mach giojere e dandarieuj, la Ca dë Studi Piemontèis a l’ha pen-a publicà na plachëtta-strenna, un poemèt an piemontèis ëd Giovanni Tesio, con la tradusison an italian a front, Natal piemontèis (ISBN 9788882623098. Pagg. 27. € 7), soagnà con an cuvèrtin-a un Presepe, xilografia da Emanuele Luzzati ‘d Gianfranco Schialvino. Ij vers an pòrto drinta n’atmosfera ‘d religiosità rùstica e d’antan, ëd na siviltà nòsta përfonda e antica. Un pais antregh as sent arciamà a pijé part al misteri dla natività: “’l feracaval, Mario dj’Ëmlon…, Pierin ël fré, ....Neta dij Pensa…, Rita dij Gat,…Cinòta ‘d Maté,…Luis panaté…, gent ch’a travaja/ e a cin-a la schin-a/ ma ‘dco la gheusaja/ rëspond”, e tuti as buto an marcia con fiusa vers la lus ëd na caban-a, feu ‘d mesaneuit, “tuj anciarmà// da n’incantament ch’a-j fa caminé/ e a-j drissa la ment/a la lus dël foajè”. “Quartine di senari piani e tronchi che restituiscono a quell’istante – in forme e in parole di poetico incanto – tutta la forza di un evento-avvento comunitario”. Ansema al lìber-strena, la Ca dë Studi a propon an via Revel 15, come tradission, la mostra “Un libro per Natale”, ch’as deurb ël 13 dë dzèmber a parte da 11 ore dla matin, e a restrà duvèrta fin-a al 23 dë dzèmber. Info: tel. 011/537486; info@studipiemontesi.it; www.studipiemontesi.it. d'Albina Malerba - da TurinSet ëd La Stampa dij 10 dë dzèmber dël 2021

Indietro