Vijà 'd Natal

Natal, Natal! Ch’a dìo lòn ch’a veulo coj ch’a san, ma Natal l’é Natal e nòst Natal a ten nen fòra gnun, la caban-a a l’é për tuj, ma pròpe për tuj, ridìcol pensé ‘l contrare. E a l’é ‘n cost ëspirit che la Ca dë Studi Piemontèis a organisa ‘dcò st’agn sì, apress ëd j’antrap dël Covid ëd j’agn passà, la vija piemontèisa, e a lo fa ‘nsema a la presidensa dël Consej Regional dël Piemont. Lun-es 20 dë dzèmber a neuv ore ‘d sèira al Conservateure ‘d piassa Bodoni, vos e son e cant a-j faran festa al Bambin ëd tuj për ën Piemont ëd tuj. Aldo Sardo, Laura Conti, Enzo Vacca, Vik Noello, Nino Carriglio a faran cant e musica, antant che Rosalba Bongiovanni e Mario Brusa a diran ij test che Albina Malerba, la diretriss dla Ca dë Studi, a l’ha sernù e publicà an t’un programa ‘d sala. Test ëd la tradission e dël present, da Alberto Arnulfi a Giovanni Arpino, da Guido Gozzano a Bianca Dorato, da Nino Costa a Gipo Farassino, da Angelo Brofferio a Cesare Vincobrio, për finì, come sempe, con Renzo Gandolfo e con la soa poisìa ch’a gropa Natal e Pasqua an t’un-a tërsa circolar. L’anvit – e a pudrìa nen esse che parèj – a l’é lìber e për tuj, combin ch’a sia mej esse pontuaj për pudej fé le operassion d’intrada ch’a van fàite. E magara për pijé pòst ël pì visin possibil e cant e vos. ëd Giovanni Tesio - da TurinSet ëd La Stampa dij 17 dë dzèmber dël 2021

Indietro