Vers ëd Natal

Bon Natal e bon-e feste ai nòsti letor, con na cità antologìa ‘d poesìe an piemontèis, un bochèt ëd vers ch’an faso compagnia ant ij dì che tuti s’auguroma ch’a sio seren e steilà ant la bin dle nòste ca. “Ant ël silensi dla fiòca, la neuit/a l’ha 'l candor ëd la nossensa antica,/quand l’òm a l’era candi/e l’alba candia a-j presentava 'l di” (Camillo Brero); “Gesù Bambin l’é nà su pòca paja/trames a n’aso e un beu. Dontré pastor/ l’han portaje butir, euv e polaja” (Nino Costa). “La vita l’é viva/ l’é naje ‘l Bambin/ la roa a dësvira/ sò viramulin” (Giovanni Tesio). “Steilin-e d fiòca che ’m robate an s j’euj/ mostrandme ‘l païsagi bërlusent/ dël Paradis: e iv cange ant un moment/ant làcrime gelà . . . Steilin-e an s’jeuj” (Luigi Olivero). “…e as fan canson le lerme/e 'l gëmmi as fà paròla:/chi a peul ciamé përdon, /se nen già përdonà?” (Bianca Dorato). “E antant la Bon-a Novela,/ gioventù eterna dla vita,/ a seurt da la Cun-a cita/ e për ‘l mond së sbardela./Ant cola neuit ciàira e nùa/arson-o le stra dël mond/ ëd tuti ij pass vagabond/ vers la Caban-a sperdùa” (Aldo Daverio). “E Natal l’é Natal/festa ciàira, lusenta,/sensa temp, sensa màcie lontan-e:/d’un ancheuj, che a smija ’n sempre,/la caden-a as fa scala për che i cheujo ’l boneur./Giornà ëd lus e ’d bej seugn ël Natal:/front che as chin-o a lë s-ciòde dla vita/maravija, misteri, stupor” (Renzo Gandolfo). Auguri! Bon Natal! Bon-e Feste! d'Albina Malerba - da TurinSet ëd La Stampa dij 24 dë dzèmber dël 2021

Indietro