Val Ciusela

Son ancamin ch'i leso 'n romanz ëd Gian Luca Favetto, ch'a s'ëntìtola «Bjula delle betulle» (Aboca, pp. 287, euro 16). Ën romanz ch'a fa part ëd na colan-a ch'a s'ës-ciama «Il bosco degli scrittori» e ch'a l'é dedicà a le piante o a na pianta, con tuta na bela fila d'ëscritor, da Gian Mario Villalta a Luca Doninelli, da Enrico Brizzi a Carmine Abate, da Alberto Garlini a Laura Bosio, da Antonio Moresco a Alessandro Zaccuri. Bin, pròpe na bela inissiativa përchè piante e bòsch a son vita, vita ch'an fa vive e donca longa vita a na colan-a parèj. Ma lòn ch'i veuj dì sì a l'é d'àut. A l'é ch'a l'ha arfërstiame oghe che Favetto che - bin intèis - a scriv ën italian, a mës-cia a sò italian nen pòche paròle o espression piemontèise, përchè Bjula a l'é 'n përsonage paisan, che tutun a va girand pais e a riva 'nt le tere pì distante da soa ca. A arfëstieme, tutun, pì che cost përsonage ampastà 'd paròle piemontèise, a l'é 'l piemontèis ch'a dòvra Favetto, ch'arsent ëd val Ciusela, doa Favetto a l'ha vivù pì che n'esperiensa. Na parlada ch'a l'ha avù 'n poeta gnente mal, col Péder Corzat-Vignòt, ch'a l'ha daje dignità a la parlada 'd Ruéj. E për capì che la grafìa 'd Favetto a ven da lì a-i basta pòch. Ma l'é col pòch ch'a fa macia e ch'am fa piasì sotligné. ëd Giovanni Tesio - da TurinSet ëd La Stampa dj'11 ëd mars dël 2022

Indietro