Sergi Notario

La Prima, ‘d costi temp maleuros, a l’ha portane la notissia dla dipartìa ‘d Sergio Notario. Sergio, combin a travajeissa sotvos, a l’era bin conossù tra ij piemontesista, për ‘l sò angagi generos e vajant coma scritor an piemontèis ëd poesìe, racònt, filastròcole, ch’a firmava sovens con lë stranòm Giari tre nos; ma pì che tut a l’é stait un dij tropié pi ativ për la condivision ëd na passion: difende ‘l piemontèis con la capacità ‘d vardé a l’avnì gropand lòn ch’a l’é pì local a la vita dj’òmo daspërtut. A l’ha travajà tanto për ij Cors ëd piemontèis che la Ca dë Studi Piemontèis a l’ha për almeno quindes ani masentà për cont dla Region Piemont an nòste eut province; e peui, fin che la salute a l’ha compagnalo, për ël cors ëd Lingua e Letteratura Piemontese a l’Università dla Terza Età, a Turin e a Moncalè. Na dël 1934, a l’é stait anlev al D’Azeglio e peui a l’Università ‘d Turin, doa a l’é laureasse con Giovanni Getto dë 1961. A l’é stàit dirigent a l’Enel, ma sempre colaborand a arviste e giornaj piemontis, coma “La Slòira” e “Piemontèis Ancheuj”. Coma poeta a l’é ‘dcò confrontasse con bel deuit con j’ j’haiku, ma, darmage, a l’ha mai cujì sòi vers ant un lìber. Ùltim travaj la tradussion, con Simone Spaccasassi, dël Manifesto del Partito Comunista/Tilèt dël Partì Comunista di Karl Marx (edizioni Zambon), tema tant visin a sò sente e vive angagià ant la società, ch’a l’ha mai chità ‘d sugné pì giusta e pì uman-a. A l’arvista Sergi. d'Albina Malerba - da TurinSet ëd La Stampa dël 1m d'avril dël 2022

Indietro