Fé d'afé con l’Inteligensa Artifissial e 'l piemontèis Piemontèis Ancheuj n° 11, Novèmber 2025 Beppe Sanero (Dragonòt) Ant ël nùmer ëd «Piemontèis Ancheuj» surtì a mars ‘25, a l’é parlasse ‘d n’Inteligensa Artifissial, realisà da l’asienda cinèisa DeepSeek, ch’a parla (për la precision a scriv) bastansa bin la lenga piemontèisa. Peui, ant ël nùmer surtì a magg ‘25, a l’é parlasse d’un pàira ‘d manere ‘d dovré l’Inteligensa Artifissial (abrevià AI, da l’inglèis Artificial Intelligence) al servissi dël piemontèis. L’artìcol ëd magg a finìa con ël propòsit ëd trové àutre manere dë sfruté l’AI ant ël camp ëd la lenga piemontèisa, an manera da esse sempre an prima linia. Ma na còsa a l’é fé ‘d propòsit e n’àutra a l’é buteje an pràtica. An agost i j’era lì che minca tant i-i pensava, ma a më vnisìa gnente an ment (am pias nen parlé an prima përson-a, ma a-i è gnun-e àutre manere dë spieghé la possibilità ch’a l’é durbisse). Un bel di d’agost a l’é rivame na propòsta ‘d colaborassion da part ëd na società djë Stat Unì, un-a ‘d cole còse ch’a càpito ant nòstr mond tut colegà e globalisà. Quand i travajava, nòstr aministrator delegà a s’arcomandava d’andé dai client con “j’euj duvert, j’orìe drite e ‘l cotel an mes ai dent” e mi, anco’ abituà a fé parèj, i l’heu acetà la propòsta e peui i son andàit a capì lòn ch’a j’era da fé. L’asienda USA am contatava përchè ant mè CV (Curriculum vitae) dzor al sit LinkedIn a j’era scrivù ch’i conossìa nativament la lenga piemontèisa e che i j’era Aministrator dzor la Wikipedia an piemontèis. Për fela curta, la società a l’ha proponume ‘d fé da antreneur an lenga piemontèisa për na AI (AI trainer an lenga inglèisa). Ël travaj ëd l’antreneur AI a l’é col ëd controlé j'arzultà generà da l'Inteligensa Artifissial; an pì a deuv identifiché e coregi j'eror, le distorsion e j’ancongruense për rende ël model (o ij modej) pì fidà e sigur. A sente sta propòsta, i peule figureve mia contentëssa: nen mach i l’avìa trovà n’àutra manera ‘d dovré l’AI al servissi dël piemontèis, ma i podìa travajé ant ël camp pì inovativ ch’a-i é an cost moment-sì e contribuì al dësvlup ëd l’interfacia piemontèisa ‘d na AI. I l’heu dovù firmé un contrat ëd 14 pàgine anté ch’a-i era ‘dcò na clàusola ch’a disìa: “mi i l'heu nen dàit apògg, ant j'ùltim des agn, a përson-e o grup ch'a l’abio fàit d’assion terorìstiche". An pì i l’heu dovù firmé un No Disclosure Agreement (visadì n’Acòrd ëd Confidensialità) anté i garantisso che për sinch agn i ten-o segret i detaj dël travaj. Ij travaj a son pagà 25 $ a l’ora, però a diso lor vàire ore o minute ch’a-i và a fé un travaj. Quand che un travaj a l’é finì, a ven consignà e pochi di dòp a ven pagà. Ël pagament a ven fàit già an Euro, ël cambi a l’é bastansa sfavorèivol (për adess i 25 $ a son cambià a 20,81 €) ma a-i é gnun-e d’autre spèise. I deuvo dì ch’i l’avrìa mai chërdù ch’a fussa possìbil fé ‘d “business” (visadì fé d’afé) con l’AI e con ël piemontèis e, anvece, sòn-sì a l’é dimostrasse possìbil. E, oltra a esse pagà për travajé ant un camp anté normalment as fa ‘d volontarià, la còsa bela a l’é ch’as realisa l’obietiv d’ocupé lë spassi ‘d travaj an sj’AI e as contribuiss a fé seurte n’interfacia piemontèisa fàita “conforma a venta” (com a disìa mè nòno). A l’é sens’àutr positiv che ij dësvlup corent ëd l’AI a pijo an considerassion la lenga piemontèisa e a-i é mach da auguresse che sto andament a continua e che a aumenta. Home Page Artìcoj an piemontèis